Portugaliyalik himoyachi Joau Kanselu faoliyatini Ispaniyaning "Barselona" klubida davom ettiradigan bo'ldi. Bu haqda Euro-football.ru xabar berdi.
Kataloniyaliklar jamoasi futbolchining transferi bo'yicha barcha masalalarni hal qildi. Taniqli futbol insayderi Fabritsio Romanoning xabar berishicha, Kanselu Saudiya Arabistonining "Al-Hilol" klubi bilan amaldagi shartnomasini bekor qilish bo'yicha kelishuvga erishgan.
Ushbu qadam futbolchiga "Barselona" safiga erkin agent sifatida qo'shilish imkonini beradi. Kelasi haftaning boshida himoyachi Ispaniyaga yo'l oladi va tibbiy ko'rikdan o'tib, rasmiy shartnomani imzolashi kutilmoqda.
Eslatib o'tamiz, Joau Kanselu uchun bu "Barselona"ga qaytish hisoblanadi. U o'tgan 2023/24-yilgi mavsumda ham kataloniyaliklar sharafini ijara asosida himoya qilgan edi.
Murabbiylar shtabi himoyachining o'yin uslubini yaxshi bilishi va jamoaga tez moslashib ketishi uning transferida muhim omil bo'ldi. Futbolchi o'tgan mavsumda "Barselona" tarkibida barqaror o'yin ko'rsatib, jamoaning himoya chizig'ini kuchaytirishga muvaffaq bo'lgandi.
Endilikda tomonlar hamkorlikni uzoq muddatli shartnoma asosida davom ettirishni rejalashtirmoqda.
Izohlar
0