"Roma" klubining sobiq sardori Franchesko Totti kutilmaganda sport faoliyatini basketbol yo‘nalishida davom ettirishga qaror qildi. Bu haqda Euro-football.ru xabar berdi.
Italiyalik afsonaviy futbolchi joriy yilning iyun oyida amerikalik tadbirkor Pol Matiashich tomonidan tashkil etilgan "Maxima Roma" yangi basketbol loyihasiga o‘z hissasini qo‘shadigan bo‘ldi. Ma’lumotlarga ko‘ra, Totti dastlabki bosqichda klubga maslahatchi sifatida yordam beradi.
Shuningdek, uning asosiy vazifalaridan biri muxlislar bazasini shakllantirish, klub atrofidagi hamjamiyatni rivojlantirish va marketing ishlarini olib borishdan iborat bo‘ladi. Derbyderbyderby.it nashrining xabar berishicha, ushbu loyihada "Latsio" hujumchisi Chiro Immobile ham ishtirok etishi kutilmoqda.
Futbolchi klub rahbariyati tomonidan e’lon qilingan videolavhada ko‘rinish bergan, bu esa uning loyihaga jalb etilganini anglatadi. Eslatib o‘tamiz, Franchesko Totti 2017-yilda professional futbolchilik faoliyatini yakunlagan edi.
U o‘zining butun faoliyatini aynan "Roma" klubiga bag‘ishlagani bilan futbol tarixida alohida o‘rin egallaydi. Endilikda Tottining basketbol olamidagi yangi qadamlari muxlislar va mutaxassislarda katta qiziqish uyg‘otmoqda.
Hozircha tomonlar hamkorlik shartlari va kelajakdagi aniq rejalar borasida qo‘shimcha ma’lumotlarni oshkor etishmagan.
Izohlar
0