«Manchester Yunayted» klubi sardori Brunu Fernandesh va jamoa rahbariyati o‘rtasidagi yangi shartnoma bo‘yicha muzokaralar to‘xtab qoldi. Bu haqda Euro-football.ru xabar berdi.
Ma’lumotlarga ko‘ra, 31 yoshli portugaliyalik futbolchi klub tomonidan taqdim etilgan dastlabki taklifni rad etgan. Jurnalist Sasha Tavolyeri xabar berishicha, «qizil iblislar» yetakchiga maoshini yiliga 500 ming yevroga oshirishni taklif qilgan, biroq futbolchi ushbu shartlardan qoniqmagan.
Tomonlar o‘rtasidagi amaldagi kelishuv kelasi yilning yozida o‘z nihoyasiga yetadi. Hozirgi vaziyatdan foydalanib qolmoqchi bo‘lgan «Galatasaroy» klubi yarim himoyachining holatini kuzatib bormoqda va unga qiziqish bildirmoqda.
Eslatib o‘tamiz, Brunu Fernandesh 2020-yilning yanvar oyidan buyon «Manchester Yunayted» safida to‘p surib kelmoqda. U nafaqat jamoa sardori, balki maydondagi asosiy ijodkorlardan biri hisoblanadi.
O‘tgan mavsumda futbolchi Premer-ligada yaratilgan vaziyatlar bo‘yicha rekord o‘rnatib, 21 ta golli uzatmani amalga oshirishga muvaffaq bo‘lgan edi. Hozircha tomonlar kelishuvga erisha olmagan, biroq muzokaralar davom etishi kutilmoqda.
Klub rahbariyati o‘z sardorini saqlab qolish uchun yangi strategiyani ishlab chiqishi kerak bo‘ladi.
Izohlar
0