«Manchester Siti» hujumchisi Erling Xolandning faoliyatini Ispaniya chempionatida davom ettirishi mumkinligi haqidagi mish-mishlar yana avj olmoqda. Bu haqda Euro-football.ru xabar berdi.
Norvegiyalik futbolchining ingliz klubi bilan amaldagi shartnomasi 2034-yilga qadar mo‘ljallangan bo‘lsa-da, ko‘plab ekspertlar va manbalar hujumchi shartnoma muddati tugaguniga qadar jamoani tark etishini taxmin qilishmoqda. Mashhur insayder Matteo Moretto Madrid Universal nashriga bergan intervyusida Xolandning kelajagi borasida o‘z fikrlarini o‘rtoqlashdi.
Uning so‘zlariga ko‘ra, futbolchining navbatdagi manzili Ispaniya bo‘lishi deyarli aniq. Hozircha u aynan qaysi klub libosini kiyishi noma’lum, ammo Xoland La Ligada o‘ynashga katta qiziqish bildirmoqda.
Mutaxassisning ta’kidlashicha, ertami-kechmi norvegiyalik yulduz Ispaniya chempionatiga ko‘chib o‘tadi. Futbol olamidagi vaziyatdan kelib chiqib aytadigan bo‘lsak, 26 yoshli hujumchi uchun asosiy da’vogarlar sifatida Madridning «Real» va «Barselona» klublari tilga olinmoqda.
Transfermarkt portali hozirgi vaqtda Erling Xolandning bozor qiymatini 220 million yevroga baholamoqda. Ushbu transfer amalga oshsa, u futbol tarixidagi eng qimmatbaho kelishuvlardan biriga aylanishi shubhasiz.
Hozircha tomonlar rasmiy muzokaralar olib borayotgani haqida aniq ma’lumotlar mavjud emas, biroq futbol olamidagi bu shov-shuvli xabar muxlislar e’tiborida qolmoqda.
Izohlar
0