Italiya futbol klubi «Bolonya» hamda BolognaFiere kompaniyasi yangi stadion qurilishi bo‘yicha o‘zaro kelishuvga erishdi. Bu haqda Euro-football.ru xabar berdi.
Il Resto del Carlino nashrining xabar berishicha, sig‘imi 35 ming tomoshabinga mo‘ljallangan zamonaviy arena 2031-yilning bahoriga qadar foydalanishga topshirilishi rejalashtirilgan. Loyihaning umumiy qiymati qariyb 300 million yevroni tashkil etadi.
Yangi stadion ko‘p funksiyali inshoot sifatida loyihalashtirilgan. Xususan, arenada ochilib-yopiladigan tom va harakatlanuvchi futbol maydoni bo‘ladi.
Bu texnik yechimlar stadionda nafaqat futbol uchrashuvlari, balki konsertlar, ko‘rgazmalar va boshqa yirik ommaviy tadbirlarni ham yuqori saviyada o‘tkazish imkonini beradi. «Bolonya» klubi ushbu yangi maydonda 2031-2032-yilgi mavsumdan boshlab o‘z uy o‘yinlarini o‘tkazishni maqsad qilgan.
Avvalroq xabar berilganidek, Italiya futbol federatsiyasi Bolonya shahrini 2032-yilgi Yevropa chempionatiga mezbonlik qilishi mumkin bo‘lgan 13 ta nomzod shahar qatoriga kiritgan edi. Ayni damda UEFA taqdim etilgan barcha arizalarni sinchkovlik bilan o‘rganib chiqmoqda.
Yakuniy bosqichda turnir talablariga to‘liq javob beradigan beshta eng mos stadion tanlab olinadi. Ushbu yangi loyiha shaharning Yevro-2032 mezbonligi uchun bo‘lgan imkoniyatlarini sezilarli darajada oshirishi kutilmoqda.
Izohlar
0