Prezident Shavkat Mirziyoyev mamlakatimiz shaharsozlik siyosatidagi eng yirik va strategik ahamiyatga ega bo‘lgan Yangi Toshkent loyihasini amalga oshirish yuzasidan navbatdagi muhim qarorni e’lon qildi. Bu haqda Zamin.uz xabar berdi.
Davlat rahbarining tashabbusiga binoan, respublikaning barcha viloyatlariga poytaxtning yangi barpo etilayotgan qismidan 100 gektardan yer maydoni ajratilishi belgilandi. Mazkur qaror mamlakat hududlarining o‘ziga xos madaniy qadriyatlari, iqtisodiy imkoniyatlari hamda me’moriy an’analarini poytaxtning yangi qiyofasida mujassamlashtirishni ko‘zda tutadi.
Ushbu loyiha nafaqat poytaxt infratuzilmasini kengaytirish, balki hududlararo o‘zaro hamkorlikni kuchaytirish va har bir viloyatning salohiyatini namoyon etish uchun yangi platforma vazifasini o‘taydi. Yangi Toshkent hududida ajratilgan yer maydonlarida har bir hududning tarixiy va zamonaviy xususiyatlarini aks ettiruvchi majmualar, madaniy markazlar hamda iqtisodiy zonalar bunyod etilishi rejalashtirilgan.
Bu jarayon shaharning umumiy me’moriy yechimiga uyg‘unlashgan holda, milliy o‘ziga xoslikni saqlab qolishga xizmat qiladi. Davlat rahbari ushbu tashabbus orqali hududiy rivojlanishni yangi bosqichga olib chiqish va poytaxtni chinakamiga umumxalq markaziga aylantirishni maqsad qilgan.
Loyihani amalga oshirishda sifat va samaradorlikka alohida e’tibor qaratilishi ta’kidlab o‘tildi.
Izohlar
0