O‘zbekistonda kichik va o‘rta biznes vakillari, jumladan, do‘konlar, savdo shoxobchalari hamda turli xizmat ko‘rsatish maskanlari egalari uchun uzoq vaqtdan buyon muammo bo‘lib kelgan byurokratik jarayonlar yengillashtirildi. Bu haqda Zamin.uz xabar berdi.
Vazirlar Mahkamasi tomonidan qabul qilingan yangi qarorga muvofiq, tadbirkorlik subyektlari o‘z faoliyatini yuritayotgan bino va inshootlar peshtoqiga o‘rnatadigan axborot peshlavhalari endilikda tashqi reklama obyekti hisoblanmaydi. Mazkur o‘zgarish tadbirkorlarning o‘z biznesini yuritish jarayonidagi ortiqcha hujjatbozlik va keraksiz xarajatlarning oldini olishga qaratilgan.
Shu paytgacha mazkur peshlavhalarni o‘rnatish uchun ruxsatnoma olish hamda tegishli to‘lovlarni amalga oshirish talab etilar edi. Endilikda esa tadbirkorlar o‘z obyektlariga qonuniy ravishda axborot vositalarini joylashtirishi mumkin.
Bu yangilik xususiy sektor vakillarining ishini yengillashtirib, ularga qulay muhit yaratish hamda tadbirkorlik faoliyatini yanada rivojlantirish uchun huquqiy asos vazifasini o‘taydi. Mutaxassislarning fikricha, bu qaror ayniqsa chakana savdo va xizmat ko‘rsatish sohasidagi kichik biznes vakillari uchun iqtisodiy jihatdan samarali qadam hisoblanadi.
Izohlar
0