O‘zbekiston o‘zining boy turizm salohiyati bilan xalqaro maydonda muhim e’tirofga sazovor bo‘ldi. Bu haqda Zamin.uz xabar berdi.
Nufuzli Much Better Adventures xalqaro sayyohlik platformasi 2026-yil uchun yakka tartibdagi sarguzashtli sayohatlar bo‘yicha eng istiqbolli yo‘nalishlar ro‘yxatini taqdim etdi. Mazkur reytingda O‘zbekiston dunyoning ko‘plab davlatlari orasidan munosib o‘rin egallab, beshinchi pog‘onadan joy oldi.
Bu natija mamlakatimizning nafaqat boy madaniy-tarixiy merosi, balki faol dam olish va ekstremal turizm turlarini rivojlantirish borasidagi ulkan imkoniyatlarini ham namoyish etadi. Ekspertlar tomonidan tuzilgan ushbu ro‘yxat xorijlik sayyohlar uchun yangi va g‘ayrioddiy yo‘nalishlarni kashf etishga xizmat qiladi.
O‘zbekistonning mazkur nufuzli ro‘yxatga kiritilishi xalqaro turizm bozorida mamlakatimizning jozibadorligini yanada oshiradi. Bu kabi yuqori baho, ayniqsa, sarguzasht izlovchi sayohatchilar uchun qulay infratuzilma va noyob turistik mahsulotlar yaratish borasidagi sa’y-harakatlar samarasidir.
Kelgusida mazkur e’tirof O‘zbekistonga tashrif buyuruvchi xorijiy mehmonlar oqimini ko‘paytirish hamda turizm sohasini iqtisodiyotning yetakchi tarmoqlaridan biriga aylantirish yo‘lida muhim qadam bo‘lishi kutilmoqda.
Izohlar
0