O‘zbekistonda oziq-ovqat mahsulotlari xavfsizligini ta’minlash borasidagi davlat siyosati yangi bosqichga ko‘tarilmoqda. Bu haqda Zamin.uz xabar berdi.
Oliy Majlis Senatining navbatdagi yalpi majlisida qabul qilingan “Oziq-ovqat mahsulotining xavfsizligi to‘g‘risida”gi qonun sohaga oid huquqiy bazani tubdan mustahkamlashga qaratilgan. Mazkur hujjatning asosiy maqsadi aholini iste’mol bozorida sifatli va xavfsiz oziq-ovqat mahsulotlari bilan uzluksiz ta’minlash, shuningdek, sifatsiz mahsulotlarning muomalaga chiqib ketishining oldini olishdan iborat.
Yangi qonun qoidalari oziq-ovqat mahsulotlarini yetishtirish, qayta ishlash, saqlash, tashish va sotish jarayonlarida ishtirok etuvchi barcha tadbirkorlik subyektlari uchun aniq majburiyatlarni belgilab beradi. Endilikda ishlab chiqaruvchilar va savdo vakillari sanitariya-gigiyena me’yorlariga qat’iy rioya etishlari hamda mahsulot xavfsizligini kafolatlovchi zarur texnik reglamentlarga amal qilishlari shart.
Qonunchilikdagi bu o‘zgarishlar iste’molchilarning huquqlarini himoya qilish bilan bir qatorda, bozordagi raqobat muhitini sog‘lomlashtirishga ham xizmat qiladi. Nazorat mexanizmlarining kuchaytirilishi esa sohaga mas’uliyatsizlik bilan yondashuvchi subyektlarning faoliyatini tartibga solib, umumiy xavfsizlik darajasini oshirishga yo‘naltirilgan.
Izohlar
0