O‘zbekiston hududidagi istirohat bog‘lari, xiyobonlar va boshqa jamoat joylarida jamoat tartibini saqlash hamda odob-axloq qoidalariga rioya etish ustidan nazorat choralari kuchaytirilmoqda. Bu haqda Zamin.uz xabar berdi.
So‘nggi paytlarda ijtimoiy tarmoqlarda keng muhokamalarga sabab bo‘layotgan holatlar va vakolatli idoralarning rasmiy ogohlantirishlariga ko‘ra, jamoat joylarida o‘zini tutish madaniyatiga zid xatti-harakatlar sodir etayotgan fuqarolarga nisbatan qat’iy choralar ko‘riladi. Xususan, odamlar gavjum joylarda ochiqchasiga ishqiy munosabatda bo‘lgan, jamiyatda qabul qilingan axloq me’yorlarini buzgan shaxslarga nisbatan qonunchilikda belgilangan tartibda ma’muriy ta’sir choralari qo‘llanilishi ko‘zda tutilgan.
Mutasaddilarning ta’kidlashicha, ushbu chora-tadbirlar fuqarolarning o‘zaro hurmatini saqlash, oilaviy dam olish maskanlarida ma’naviy muhitni barqarorlashtirish hamda jamoat tartibini buzilishining oldini olishga qaratilgan. Huquqni muhofaza qiluvchi organlar jamoat joylarida yurish-turish qoidalariga rioya qilish har bir fuqaroning burchi ekanligini eslatib, qoidabuzarliklar uchun javobgarlik muqarrar ekanligini ma’lum qilmoqda.
Aholi o‘rtasida madaniy xulq-atvor ko‘nikmalarini targ‘ib qilish va jamoat joylaridagi huquqbuzarliklarni kamaytirish maqsadida nazorat tadbirlari yanada jadallashtiriladi.
Izohlar
0