Toshkent shahrining Chilonzor tumanida joylashgan Al-Xorazmiy ko‘chasining 700 metr uzunlikdagi qismida muhandislik-qurilish va montaj ishlari amalga oshirilishi rejalashtirilgan. Bu haqda Zamin.uz xabar berdi.
Ushbu jarayonlar davomida xavfsizlik choralarini ta’minlash hamda texnik ishlarni sifatli bajarish maqsadida mazkur hududda avtotransport vositalarining qatnovi vaqtincha cheklanadi. Cheklovlar belgilangan jadvalga muvofiq bir necha bosqichda amalga oshiriladi.
Xususan, joriy yilning 7 oktyabr kuni soat 22:00 dan 8 oktyabr soat 06:00 ga qadar, shuningdek, 8 oktyabr soat 22:00 dan 9 oktyabr soat 06:00 ga qadar avtomobillar harakati to‘xtatiladi. Shundan so‘ng, 9 oktyabr soat 15:00 dan boshlab 11 oktyabr soat 00:00 gacha bo‘lgan davrda ham yo‘l qismi yopiq bo‘ladi.
Mazkur cheklovlar amal qiladigan vaqt oralig‘ida jamoat transporti faoliyatiga ham qisman o‘zgartirishlar kiritiladi. Xususan, 69 va 77-sonli avtobus yo‘nalishlari vaqtincha o‘zgartirilgan sxema bo‘yicha harakatlanadi.
Haydovchilardan yuzaga kelishi mumkin bo‘lgan noqulayliklarning oldini olish maqsadida ushbu hududda muqobil yo‘llardan foydalanish tavsiya etiladi. Ishlarni belgilangan muddatlarda yakunlash va yo‘l harakati xavfsizligini ta’minlash bo‘yicha tegishli tashkilotlar tomonidan zarur choralar ko‘rilmoqda.
Izohlar
0