Rossiyada RAM pikaplariga bo‘lgan talab ikki barobardan oshdi

Rossiya avtomobil bozorida Amerika ishlab chiqaruvchilariga mansub yirik hajmli pikaplarga bo‘lgan talab sezilarli darajada o‘sdi. Bu haqda Zamin.uz xabar berdi.

Ixbt.com nashri tomonidan e’lon qilingan ma’lumotlarga ko‘ra, joriy yilning dastlabki to‘rt oyi mobaynida mamlakatda RAM brendiga tegishli 892 ta yangi transport vositasi davlat ro‘yxatidan o‘tkazilgan. Taqqoslash uchun, o‘tgan yilning xuddi shu davrida ushbu ko‘rsatkich 403 tani tashkil etgan edi, ya’ni sotuv hajmi 121 foizga oshgan.

Avtostat tahliliy agentligi rahbari Sergey Tselikovning qayd etishicha, xaridorlar orasida eng katta qiziqish RAM 1500 modeliga qaratilgan. Hisobot davrida ushbu modelning 877 ta nusxasi xaridorini topgan bo‘lsa, qolgan 15 ta holat og‘irroq vazn toifasidagi RAM 2500 pikapi hissasiga to‘g‘ri keladi.

Ayni paytda mazkur avtomobillar Rossiyaga muqobil logistik kanallar orqali kirib kelmoqda. Rasmiy yetkazib berish tizimi to‘xtatilgan bo‘lishiga qaramay, parallel import sxemasi doirasida mashinalar asosan BAA va Qirg‘iziston hududlari orqali keltirilmoqda.

Sanoat ekspertlari RAM 1500 modeli o‘zining texnik quvvati hamda yuqori darajadagi interyeri sababli premium segmentdagi yo‘ltanlamaslar o‘rnini egallayotganini ta’kidlashmoqda. Mazkur tendensiya G‘arb brendlarining rasmiy vakolatxonalari faoliyati to‘xtaganiga qaramay, Rossiya bozorida qimmatbaho avtomobillarga bo‘lgan barqaror talab saqlanib qolayotganini anglatadi.