Afg‘onistonning Tahor viloyatida ijod qiluvchi shoira Mujda O‘zbek Tolibon xavfsizlik kuchlari tomonidan hibsga olindi. Bu haqda Zamin.uz xabar berdi.
Mahalliy manbalardan olingan ma’lumotlarga ko‘ra, shoiraning qo‘lga olinishiga uning ijtimoiy-siyosiy mavzulardagi, xususan, amaldagi hukumat siyosati va mamlakatdagi joriy vaziyatni tanqid ostiga olgan she’rlari asosiy sabab bo‘lgan. Kabul Now nashriga 4 oktyabr kuni taqdim etilgan axborotda qayd etilishicha, mazkur hodisa bundan to‘rt kun muqaddam Taloqan shahrida yuz bergan.
Hozirgi vaqtda shoira Tolibon vakillari tomonidan nazorat ostida ushlab turilibdi. Uning hibsga olinishi mintaqadagi so‘z erkinligi bilan bog‘liq vaziyatni yana bir bor kun tartibiga chiqardi.
O‘z ijodiy faoliyati orqali jamiyatdagi muammolarni yoritishga uringan shoiraning taqdiri va unga nisbatan ko‘rilayotgan choralar yuzasidan rasmiy idoralar tomonidan hozircha aniq izoh berilmagan. Mazkur voqea hududdagi adabiy muhit va ijodkorlar uchun xavfsizlik masalasi qanchalik dolzarb ekanligini ko‘rsatib bermoqda.
Izohlar
0