Ijtimoiy tarmoqlarda Ruki Vverx guruhi solisti Sergey Jukovning ovoziga o‘xshashligi hamda Privet, eto ya qo‘shig‘ini ijro etib, katta mashhurlikka erishgan parodiyachi Samvel Sarukyan faoliyati bilan bog‘liq yangi ma’lumotlar tarqaldi. Bu haqda Zamin.uz xabar berdi.
Ma’lum bo‘lishicha, 44 yoshli ijrochi Rossiya Federatsiyasi Mudofaa vazirligi bilan harbiy xizmatni o‘tash bo‘yicha rasmiy shartnoma imzolagan. Hozirgi kunda jazo muddatini qamoqxonada o‘tayotgan Samvel Sarukyan o‘z xohishi bilan harbiy harakatlarda qatnashishga qaror qilgan.
Bu haqda Rossiyaning ommabop Shot Telegram-kanali xabar berdi. Internet foydalanuvchilari orasida o‘ziga xos tarzda tanilgan parodiyachining ushbu qarori jamoatchilikda qiziqish uyg‘otdi.
Ayni paytda mazkur holat yuzasidan boshqa tafsilotlar ochiqlanmagan bo‘lib, Sarukyan shartnoma shartlariga muvofiq harbiy tayyorgarlik va keyingi jarayonlarga jalb etilishi kutilmoqda. Mazkur voqea ijtimoiy tarmoqlardagi muhokamalar markazida qolmoqda.
Izohlar
0