Rossiya Federatsiyasi Qurolli kuchlari Markaziy Osiyo strategik yo‘nalishida hamda Kaspiy dengizi akvatoriyasida keng ko‘lamli harbiy manevrlarga kirishdi. Bu haqda Zamin.uz xabar berdi.
Sentr-2026 qo‘mondonlik-shtab o‘quv mashg‘ulotlari doirasida o‘tkazilayotgan ushbu tadbirlar mintaqadagi ehtimoliy harbiy tahdidlarning oldini olish va ularga qarshi kurashish, shuningdek, Kaspiy dengizi hududida xavfsizlikni ta’minlashga qaratilgan murakkab jangovar ssenariylarni amalda sinab ko‘rishni maqsad qilgan. Mazkur yirik strategik mashg‘ulotlarda 47 mingdan ortiq harbiy xizmatchi, shuningdek, zamonaviy qurol-yarog‘ va harbiy texnika birliklari ishtirok etmoqda.
Manbalarga ko‘ra, harakatlar davomida qo‘shinlarning o‘zaro hamkorligi, boshqaruv tizimining barqarorligi va kutilmagan vaziyatlarda tezkor qaror qabul qilish qobiliyati baholanadi. Mashg‘ulotlarning asosiy bosqichlari turli poligonlarda va dengiz hududlarida bir vaqtning o‘zida amalga oshirilmoqda.
Rossiya mudofaa idorasi mazkur tadbirlar mintaqaviy barqarorlikni saqlash va yuzaga kelishi mumkin bo‘lgan xavf-xatarlarga tayyorlik darajasini oshirishga xizmat qilishini ta’kidladi. Ayni paytda o‘quv mashg‘ulotlari belgilangan reja asosida davom etmoqda.
Izohlar
0