Pokistonning Panjob viloyati Rajanpur tumanida kuzatilgan savdo jarayoni jamoatchilik e’tiborini tortdi. Bu haqda Zamin.uz xabar berdi.
Mahalliy manbalarga ko‘ra, mazkur hududda Shiri zotiga mansub noyob echki 1,8 million rupiy evaziga sotilgan. Taxminan 15 kilogramm vaznga ega bo‘lgan mazkur jonivor o‘zining jismoniy ko‘rinishi, noyob tusga ega ekanligi hamda nasl-nasabi bilan xaridorlar diqqatini o‘ziga tortgan.
Savdo bitimi yakunlangach, xaridor echkini olib ketish uchun maxsus avtokortej tashkil etgan. Jonivorni yangi manzilga kuzatib qo‘yish jarayoni o‘ziga xos tarzda o‘tgan.
Xususan, kuzatuv marosimi davomida do‘mbiralar chalinib, yig‘ilganlar xursandchilik bilan raqsga tushishgan. Ushbu voqea hudud aholisi orasida katta qiziqish uyg‘otdi va mahalliy matbuotda keng yoritildi.
Mutaxassislarning fikricha, bunday yuqori narxlar aynan zotdor hayvonlarning noyob xususiyatlari va ularga bo‘lgan talabning ortib borayotgani bilan bog‘liqdir. Ushbu holat chorvachilik sektoridagi o‘ziga xos savdo an’analaridan biri sifatida baholanmoqda.
Izohlar
0