Olimlar dengizda yashagan yangi yirtqich turini aniqlashdi

Palaeontologlar guruhi o‘tkazilgan tadqiqotlar natijasida dinozavrlar yashagan davrga oid yirik dengiz sudralib yuruvchisining yangi turini aniqlashdi. Bu haqda Zamin.uz xabar berdi.

Reuters agentligining xabar berishicha, ushbu jonzot Tylosaurus rex deb nomlandi. Ilmiy izlanishlar doirasida mutaxassislar avvalroq topilgan va muzey fondlarida saqlanayotgan qazilma suyak qoldiqlarini qayta tahlil qilishdi.

Olingan natijalar ushbu organizm avval ma’lum bo‘lgan turlardan farqli ravishda mutlaqo yangi va alohida turga mansub ekanligini ko‘rsatdi. Tylosaurus rex anatomik tuzilishi, xususan, katta gavdasi, o‘tkir tishlari hamda rivojlangan jag‘ va bo‘yin mushaklari tufayli o‘z davrining o‘ta xavfli yirtqichi bo‘lgan.

Mazkur tur taxminan 80 million yil muqaddam Shimoliy Amerika hududidagi qadimiy ichki dengizlarda hayot kechirgan. Olimlarning hisob-kitoblariga ko‘ra, ushbu dengiz yirtqichining uzunligi 13 metrga yetgan.

Mutaxassislarning taxminiga ko‘ra, mazkur jonivor asosan yirik baliqlar va boshqa dengiz vakillari bilan oziqlangan. O‘z davrida ushbu sudralib yuruvchi okean ekotizimidagi eng qudratli ovchilardan biri sifatida muhim o‘rin tutgan.