Krishtianu Ronaldu zilziladan jabr ko‘rgan bolaga dalda yo‘lladi

Portugaliya milliy futbol jamoasi sardori Krishtianu Ronaldu Venesuelada yuz bergan halokatli zilzila oqibatida jiddiy jarohat olgan 11 yoshli Andres Melesni qo‘llab-quvvatlash maqsadida maxsus videomurojaat yo‘lladi. Bu haqda Zamin.uz xabar berdi.

Sport nashri tarqatgan xabarga ko‘ra, mazkur tashabbus yosh muxlisning ezgu niyatini ro‘yobga chiqarishga xizmat qildi. Tabiiy ofat Andres uchun fojiali yakun topdi: kuchli yer qimirlashi natijasida bola bir oyog‘idan ayrildi, uning oila a’zolari esa vayronalar ostida qolib, vafot etdi.

Qutqaruv guruhlari yosh bolani qiyinchilik bilan vayronalar ostidan olib chiqishgan. Hozirgi kunda Andres Meles og‘ir tibbiy va ruhiy holatni boshdan kechirmoqda.

Dunyoga mashhur futbolchining bunday e’tibori va ko‘rsatgan hamdardligi bola uchun ruhiy dalda bo‘lib, uning hayotga bo‘lgan qiziqishini qaytarishda muhim ahamiyat kasb etadi. Ronaldu o‘z murojaatida bolaga kuch-quvvat tilab, uning matonati barchani hayratga solayotganini ta’kidlagan.

Ushbu voqea butun dunyo jamoatchiligi e’tiborini jalb etib, sportchilarning xayrli ishlarga qo‘shib kelayotgan hissasini yana bir bor namoyon qildi.