AQSHning Kaliforniya shtatida joylashgan Mono okrugi bepul kutubxonalar tarmog‘iga qarashli Mammot-Leyks filialida g‘ayrioddiy hodisa qayd etildi. Bu haqda Zamin.uz xabar berdi.
14 oktyabr kuni erta tongda binoga kirib olgan qora ayiq xodimlarga tegishli oziq-ovqat mahsulotlarini yeb ketdi. Kuzatuv kameralariga muhrlangan tasvirlarga ko‘ra, yirtqich hayvon kutubxona xonalarini bemalol aylanib chiqqan va hech qanday qarshiliksiz o‘z ixtiyori bilan tashqariga yo‘l olgan.
The Guardian nashrining xabar berishicha, ushbu voqea mahalliy vaqt bilan soat 06:10 atrofida, muassasa o‘z faoliyatini boshlashidan biroz avvalroq sodir bo‘lgan. Garchi ayiqning binoga kirishi xodimlarni sarosimaga solgan bo‘lsa-da, kutubxona inventariga yoki kitoblarga jiddiy zarar yetkazilmagani ma’lum qilindi.
Mutaxassislar ushbu holatni yovvoyi hayvonlarning oziq-ovqat izlab aholi punktlariga yaqinlashishi bilan izohlamoqda. Ayni damda kutubxona ma’muriyati xavfsizlik choralarini kuchaytirish bo‘yicha tegishli tavsiyalarni ko‘rib chiqmoqda.
Izohlar
0