Italiyaning Il Messaggero nashri tarqatgan xabarga ko‘ra, Sardiniya oroli qirg‘oqlarida qimmatbaho super yaxta bilan bog‘liq noxush hodisa yuz berdi. Bu haqda Zamin.uz xabar berdi.
Qiymati 9 million yevrodan ortiq deb baholangan ushbu kema o‘zining yangi egasiga topshirilganidan atigi to‘rt kun o‘tib, yong‘in oqibatida cho‘kib ketdi. Ma’lumotlarga ko‘ra, mazkur ko‘ngilsiz voqea 30 metr uzunlikdagi Angiola II nomli yaxtada sodir bo‘lgan.
Kema Porto Chervo hududiga yaqin joylashgan Kosta Smeralda sohillari yaqinida bo‘lgan paytda to‘satdan yong‘in boshlangan. Hodisa yuz bergan vaqtda kema bortida bo‘lgan yo‘lovchilar va ekipaj a’zolari zudlik bilan xavfsiz hududga evakuatsiya qilingan.
Hozirda mutaxassislar yong‘in kelib chiqish sabablarini aniqlash maqsadida surishtiruv ishlarini olib bormoqda. Dastlabki taxminlarga ko‘ra, kemaning texnik tizimidagi nosozliklar yong‘in uchun asosiy sabab bo‘lishi mumkin.
Qimmatbaho aktivning qisqa vaqt ichida yaroqsiz holga kelishi dengiz transporti sohasidagi kam uchraydigan holatlardan biri sifatida qayd etildi.
Izohlar
0