Hindistonda o‘tkazilgan an’anaviy diniy marosim kutilmagan ko‘ngilsizlik bilan yakunlandi. Bu haqda Zamin.uz xabar berdi.
21 oktyabr kuni mamlakat miqyosida keng nishonlanadigan Dasara bayrami doirasida tashkil etilgan yurish paytida jiddiy tartibsizlik va ommaviy vahima kuzatildi. Hodisaga bayram tantanalarida ishtirok etayotgan filning quturib ketishi sabab bo‘ldi.
Ma’lum bo‘lishicha, hayvon kumush va oltindan yasalgan, umumiy og‘irligi 650 kilogrammga teng bo‘lgan ulkan butni ko‘tarib yurishga majbur qilingan. Haddan tashqari og‘ir yuk hamda atrof-muhitdagi kuchli shovqin ta’sirida fil o‘zini yo‘qotib, nazoratdan chiqdi va agresiv harakatlarni boshladi.
Hayvonning to‘satdan vahimaga tushishi oqibatida bayram ishtirokchilari orasida sarosima yuzaga keldi. Voqea joyidagi aholi va ziyoratchilar xavfsiz hududga o‘tishga harakat qilar ekan, tartibsizliklar yanada kuchaydi.
Hozirda tegishli xizmatlar vaziyatni barqarorlashtirish va jabrlanganlarni aniqlash bo‘yicha ish olib bormoqda. Mutaxassislar hayvonlarning bunday sharoitlarda ekspluatatsiya qilinishi xavfsizlik qoidalariga zid ekanligini ta’kidlab, kelgusida bunday holatlarning oldini olish choralarini ko‘rish zarurligini qayd etishdi.
Izohlar
0