Floridada istiqomat qiluvchi 32 yoshli bloger va uch nafar farzandning onasi Danielle Marpl o‘z hayotida muhim va keskin o‘zgarish yasashga qaror qildi. Bu haqda Zamin.uz xabar berdi.
Bu qaror uning onasi saraton xastaligi sababli vafot etganidan so‘ng qabul qilindi. Tibbiy tekshiruvlar natijasida Danielle BRCA1 gen mutatsiyasi tashuvchisi ekanligi aniqlandi.
Ushbu genetik o‘zgarish kelajakda xavfli o‘sma kasalliklarining rivojlanish xavfini sezilarli darajada oshiradi. Mazkur xavfni minimal darajaga tushirish hamda farzandlari bag‘rida uzoqroq yashash niyatida Danielle Marpl murakkab jarrohlik amaliyotlariga rozilik berdi.
U profilaktika maqsadida o‘zining reproduktiv a’zolari va ko‘krak bezlarini olib tashlatishga qaror qildi. Mutaxassislarning fikricha, bunday radikal choralar saraton xastaligining oldini olishda samarali hisoblanadi.
Danielle Marpl o‘zining bu qadami orqali nafaqat shaxsiy salomatligini asrashni, balki boshqa ayollarni ham o‘z sog‘lig‘iga nisbatan yanada mas’uliyatli bo‘lishga chaqirishni maqsad qilgan. Hozirda u tiklanish jarayonini o‘tkazmoqda va o‘z tajribasini jamoatchilik bilan bo‘lishishda davom etmoqda.
Izohlar
0