AQSHning Portlend shahrida joylashgan Oaks Amusement Park ko‘ngilochar bog‘ida yuz bergan texnik nosozlik ortidan jabrlangan ikki nafar o‘smir qizga 275 ming dollardan miqdorida kompensatsiya to‘lanishi belgilandi. Bu haqda Zamin.uz xabar berdi.
Mazkur hodisa 2024-yil 14-iyun sanasida qayd etilgan. Ma’lumotlarga ko‘ra, o‘sha kuni AtmosFEAR attraksioni 28 nafar yo‘lovchi bilan harakatlanayotgan bo‘lgan.
Kutilmagan texnik nosozlik oqibatida qurilma to‘satdan ishdan chiqqan va odamlar bilan birga teskari holatda osilib qolgan. Ushbu holat attraksiondagi mehmonlar uchun jiddiy xavf tug‘dirib, ularning ruhiy hamda jismoniy holatiga salbiy ta’sir ko‘rsatgan.
Voqea joyiga zudlik bilan qutqaruv xizmatlari jalb etilib, attraksionda qolib ketgan fuqarolarni evakuatsiya qilish ishlari amalga oshirilgan. Ushbu noxush hodisa bog‘ ma’muriyatining xavfsizlik choralariga qayta baho berilishiga sabab bo‘ldi.
Jabrlangan o‘smirlarning vakillari va bog‘ rahbariyati o‘rtasida o‘tkazilgan muzokaralar natijasida tomonlar tovon puli masalasida kelishuvga erishdilar. Hozirgi vaqtda Oaks Amusement Park rahbariyati texnik nazoratni kuchaytirish va kelgusida bunday holatlarning oldini olish bo‘yicha qo‘shimcha choralar ko‘rilayotganini ma’lum qilgan.
Mazkur voqea xavfsizlik standartlariga rioya etish har qanday ko‘ngilochar maskan uchun ustuvor vazifa ekanligini yana bir bor tasdiqladi.
Izohlar
0